Jour : 14 avril 2020

Nitohy indray ny fisarihana olona ho amin’ny fitangoronana, io maraina io. Ho zaraina indray manko ny lelavola 100.000 ar, ho an’ireo tena sahirana sy marefo ary tapaka karama. Tsy avy hatrany dia zaraina io vola io fa mbola mitandahatra aloha ny olona, mitondra ny mombamomba azy, miaraka amin’ny karapananodro sy ny karinem-pokontany. Ho dinihan’ny tompon’andraikitra tsirairay aloha ireo antotan-taratasy ireo ary mbola hamarinina avy eo.

Lehilahy roa, samy 57 taona ary samy eto Antananarivo  indray no voatily fa voan’ny tsimokaretina coronavirus tamin’ity andro ity. Araka izany, dia efa tsaboina eny amin’ny hopitalin’ Anosiala sy Befelatanana izy ireo.

Nahavariana sy nahatalanjona ny mponin’Ambohimangakely ny nahafantatra fa nisy soa aman-tsara ny fotoam-pivavahana notanterahana, tao amin’ny fiangonana Anglikana Santa Jaona Ambohimangakely, ny andron’ny Alakamisy masina sy ny ny alahadin’ny Paska teo.

Niavaka ny fankalazana ny fetin’ny Paska tamin’ity taona ity. Ankoatra ny tsy fahafahana namonjy ny toeram-pivavahana (fiangonana) dia tao anatin’ny fihibohana ihany koa no mbola niainan’ny Malagasy ny alatsinain’ny Paska, fotoana natokana hialana voly sy hitsangatsanganana, eny amin’ireo toerana sy sehatra voatokana ho amin’izany.