Anisan’ireo firenena efa lasa lavitra Madagasika raha oharina amin’ireo firenena hafa izay mpikambana miaraka amintsika mandrafitra ny Vondrona SADC raha ny eo amin’ny Fitantanana ny tandindon-doza sy ny loza voajanahary no resahana. Anton’ilay fifampizarana fahaiza-manao tanterahana eny amin’ny Novotel Alarobia nanomboka ny talata 25 novambra 2025. Ireo firenena miisa 15 mpikambana mandrafitra ny Vondrona SADC araka izany no mifampizara traikefa amin’izao dinikasa izao. Tanjona ny fanamafisana ny fiatrehana ireo ambana marolafy mahakasika ny Fitantanana ny tandindon-doza sy ny loza voajanahary. Ny eto amintsika izay tafiditra tanteraka ao anatin’ny vanim-potoanan’ny fahavaratra amin’izao fotoana izao. Maro ireo ambana sy loza voajanahary izay tsy maintsy tokony hotantanina mba hifehezana ny tandindonin-doza. Ao anatin’izao fivoriana atrehan’ireo Delegasiona maro ireo ny vina hanasongadinana ny Tondrozotra na ny “Feuille de route” hiarahan’ireo Firenena mpikambana rehetra anatin’ity Vondrona SADC ity. Tondrozotra izay hanompanana hatrany ny “action anticipatoire”. Nosafidiana manokana i Madagasikara noho isika ahitana izay fivoarana izay hatrany eo amin’ny Fitantanana ny tandindonin-doza sy ny loza voajanahary. Hifarana ny alakamisy 27 novambra 2025 ity dinikasa ity rehefa naharitra telo andro ny fivoriana, araka ny fanazavan’ny tale jeneralin’ny BNGRC, Général Ramanantsoa Gabriel.
