Mihamahazo vahana, maneran-tany, amin’izao fotoana izao, ny fampiasana ny “Intelligence Artificielle” na ny “IA” indrindra fa eo amin’ny fiainana andavanandro. Mihamatanjaka hatrany ihany koa ny fampiasana azy io eo amin’ny sehatry ny fanabeazana indrindra fa any amin’ireo Sekoly Ambony sy ny Oniversite tsy miankina sy miankina amin’ny fanjakana. Ny eto Madagasikara manokana dia maro ireo Sekoly Ambony sy Oniversite tsy miankina amin’ny fanjakana no efa mampiasa azy io. Anisan’izany ny “AROVY University” izay efa miditra tanteraka amin’ny fampiasana ity “IA” ity eo amin’ireo Lalam-piofanana rehetra misy ao aminy na eo aza ny fanarahana hatrany ny “Système LMD”. Ny misy ankehitriny rahateo dia mametraka fa tokony hahavoafehy ny fampiasana ny “IA” avokoa ny tsirairay. Antony ilaina ny fampianarana io “IA” io eny amin’ireo Sekoly sy Oniveriste rehetra. Velon’ahiahy amin’ny fahaverezana na fihenan’ny asa natokana ho an’ny olombelona anefa ny reehetra manoloana ny firoboroboan’ny “IA”. Tsy tokony hisy anefa izany raha ny firoboroboana sy ny fivoaran’ny teknolojia ankehitriny no jerena sy ny fahafantarana ny anjara toeran’ny “IA” eo amin’ny andavanandron’ny zanak’olombelona na azo lazaina aza fa efa tena hironan’ny ankamaroan’ny olombelona ny fampiasana azy io. Izany indrindra no hanatanterahan’ny “AROVY University”, “Varavarana misokatra”, indroa miantoana eny amin’ny “Campus “AROVY University” Ambohitrombihavana”, izay foiben-toeran’izy ireo, ny sabotsy 13 sy ny 27 septambra 2025. Tanjona ny hampahafantatra ny “AROVY University” sy ireo Lalam-piofanana rehetra misy ao aminy fa eo ihany koa ny handraisan’ireo anjara amin’ny fampahafantarana amin’ireo mpitsidika ny mahakasika, ny “IA”. Misy Lalam-piofanana miisa efatra ao amin’ny “AROVY University” dia ny “Sciences de la Santé”, ny “Sciences de la Société sy ny “Sciences et Technologies” ary ny “Art, Lettres et Sciences Humaines”. Natao ho takatry ny sarambambem-bahoaka ny saram-pianarana ao amin’ny “AROVY University” ary voafetra ny toerana ho an’ireo mpianatra te handranto fahaizana amam-pahalalana ao aminy, araka ny fanazavan’ny tompon’andraikitry ny serasera ao amin’ny “AROVY UNIVERSITY”, Randrianarivony Tojo.
