Lohahevitry ny hetsika ara-pilazantsara andiany faharoa amin’ny “Dimanche des Médias” amin’ity taona ity, ny hoe: “Compassion pour la foule” ao amin’ny Andinin-tSoratra Masina-Marka 8:2. Ity hetsika ara-pilazantsara ity izay hotanterahana eny amin’ny “Cité Planton” Ambaranjana raha ho antsika eto Madagasikara, ny alahady ho avy izao. Ny hetsika ara-pilazantsara izay karakarain’ny “Dieutv Afrique et New Media Forum” dia fotoana iray entina hitrotroana am-bavaka ny asa fanaovan-gazety sy ireo misahana izany. Noho ny fahatsapana fa mafy ny anjara andraikitr’ireo mpiantsehatra amin’izany no antom-pisian’ny “Dimanche des Médias”. Ny taona 2024, teny amin’ny HOMI Soavinandriana, no nisantaran’ny tomponandraikitra mpikarakara ity hetsika ara-pilazantsara ho an’ny mpiantsehatra amin’ny asa fanaovan-gazety ity raha ho antsika eto Madagasikara. Ny taona 2007 no niforonan’izany tany Suisse izay nanorina ny “Dimanche des Médias”. Firenena miisa 17 eto amin’ny kaontinanta Afrikanina, ankehitriny, no efa hiparitahan’ity hetsika ara-pilazantsara ity, amin’izao fotoana izao. Hotanterahana amin’ny teny Frantsay ity hetsika ara-pilazantsara izay ahitana vavaka fiderana, fiankohofana sy fijoroana vavolombelona ary fampaherezana eto Madagasikara ity noho izy io hiarahan’ny Nosy amin’ireo firenena hafa iparitahan’izany. Tsy hanavahana finoana na antokom-pivavahana fa hanasana ny rehetra ny fotoana, araka ny fanazavan’ny tomponandraikitra mpandrindra ny hetsika, Dera Shon.
