Ny 26 janoary no hankalazana ny Andro Iraisam-pirenena ho an’ny Fadintseranana. Ny Fadintseranana Malagasy dia nanatontosa izany, ny 24 janoary lasa teo, teny Anosy. Tamin’io fotoana io no nanambaran’ny tale jeneralin’ny Fadintseranana Malagasy, Lainkana Zafivanona Ernest, fa hatomboka amin’ity taona 2025 ity ny Drafitra Stratejika 2025-2029, izay mifantoka amin’ny laharam-pahamehana telo lehibe. Ny fiantohana ny fahafahan’ny toekarena malagasy mifaninana eo amin’ny sehatry ny varotra iraisam-pirenena. Ny fialana amin’ny fampiasana taratasy sy ny fanatsorana ary ny fampahafantarana ny dingana famoahana entana. Ny fiantohana ny fitovian-tsata ara-ketra mba hisian’ny fifaninanana madio. Ny 80 % amin’ny fandaharanasa fanavaozana natombony tamin’ny 2020 no efa tontosan’ny Fadintseranana Malagasy tamin’ny taona 2024. Ireo nasongadin’ny Fadintseranana Malagasy rehetra ireo izay nampifandraisana tamin’ny lohahevitra manao hoe: « Manatanteraka ny fanoloran-tena ho an’ny fahombiazana, ny fiarovana ary ny fandrosoana ».
Nandritry ny fankalazana ny Andro Iraisam-pirenena ho an’ny Fadintseranana ihany koa no nanamafisan’ny Minisitry ny Toekarena sy ny Fitantanam-bola, Rabarinirinarison Rindra Hasimbelo, fa taorian’ny dimy taona nanatontosana ny fanavaozana stratejika dia ny 80,82% amin’ny tanjona napetraka no efa tanteraka teo amin’ny Fadintseranana Malagasy. Anisan’izany ny fanamarinana ireo fanambaràna vita latsaky ny ora telo. Ny fitomboan’ny vola miditra amin’ny salan’isa 14% isan-taona. Ny fampiasana ny fahaiza-manao ara-kajy mirindra. Ankehitriny dia manomana ny ho avy indray miaraka amin’ny Drafitra stratejika 2025-2029 izay mifantoka amin’ny fanamoràna ny varotra iraisam-pirenena sy ny fanamafisana ny fanaraha-maso ny Fadintseranana ary ny fampiasana teknolojia ho fampitomboana ny fahombiazana. Ankoatra ireo dia nomarihana tamin’ny fankalazàna ihany koa ny fanolorana mari-pankasitrahana ireo Mpiasan’ny Fadintseranana miisa 19 niaraka tamin’ny “agent canin” iray izay. “Porofo mivaingana ny asa vita” no teny filamatry ny Fadintseranana Malagasy.
