Ny andiany faharoa amin’ny « Andro Nasionalin’ny Olon-dehibe eto Madagasikara » na ny « J.N.A MADA 2 » no hotanterahina any Morondava ny 28 ka hatramin’ny 31 aogositra 2025. « Olon-dehibe mijoro amin’ny finoana sy fanantenana Kristianina, hampanjaka ny fahamarinana sy ny fitiavana eo amin’ny fiarahamonina sy ny tontolo iainana » no lohahevitra hifanentanana mandritra ny efatra andro amin’ity « J.N.A MADA 2 » ity. Izy io izay hiainana ny lohahevitry ny taon-jobily 2025 manao hoe: « Mpivahinin’ny fanantenana ».
Ny fanehoana ny fiaraha-mientan’ny olon-dehibe rehetra ao amin’ny Eglizy indrindra fa ny fandraisan’anjaran’ireo olon-dehibe ireo amin’ny fiarovana ny tranobe iombonana sy ny fikajiana ny tontolo iainana no tanjona amin’ity andiany faharoa ity. Mba ho olon-dehibe mijoro amin’ny finoana sy fanantenana Kristianina izay hampanjaka ny fahamarinana sy ny fitiavana eo amin’ny fiarahamonina sy ny tontolo iainana araka izany no hohamafisina, araka ny fanentanan’ny Papa Ray masina. Ho fampiharana ny olon-dehibe apostolin’ny olon-dehibe ny “J.N.A MADA 2” noho izy io fotoana iray natokana ho an’ny antokon’olon-dehibe izay manana ny maha izy azy ao amin’ny Eglizy tahaka ny “Andron’ny ankizy na ny (J.N.E) sy ny “Andron’ny tanora” na ny (J.M.J). Hanasana ireo olon-dehibe Katolika rehetra tsy ankanavaka manerana ny diosezy 22 sy ireo any ivelany ity fotoana ity. Manodidina ny 8.000 ny isan’ireo mpizaika andrasana amin’ity andiany faharoa ity.
Ny voalohany volana martsa lasa teo no efa nanomboka nisokatra ny fisoratana anarana amin’ny andiany faharoa amin’ny « Andro Nasionalin’ny Olon-dehibe eto Madagasikara ». Hifarana ny 31 May 2025 izany. Ny taona 2017 no notontosaina tany Mananjary ny andiany voalohany tamin’ny « Andro Nasionalin’ny Olon-dehibe eto Madagasikara » andiany voalohany na ny « J.N.A MADA 1 », araky ny fanazavan’ny biraon’ny Vovonam-pirenena Katôlikan’ny olon-dehibe (VPKL).
