Anisan’ny lesoka be amin’ny fanaovana politika eto Madagasikara ny tsy fananan’ireo mpisehatra amin’izany ny fanetretena, hoy i Jhonna Augustin, olom-pirenena tsotra manaraka akaiky ny raharaham-pirenena. Tsy mampanjaka intsony ilay hoe : « Vero notaingenam-pody, tsy folaka fa mandefitra » ny ankamaron’ireo Malagasy mikirakira ny « politika ». Anisan’ny nomarihany ihany koa fa mila mivonona amin’ny lafiny rehetra ary sahy hiatrika ireo fifidianana isan’ambaratongany ny tena mpanao politika. Tsikaritra tokoa amin’ireo mpanao politika malagasy fa vitsy amin’izy ireo no afaka mifampiresaka sy mifampihaino ankehitriny noho ilay hambom-po diso toerana sy ny fankahalalana tafahoatra loatra. Samy te hampanjaka ny heviny izy ireo. Very tanteraka, araka izany, ilay soatoavina malagasy nanao ho laharam-pahamehana hatrany ny fikatsahana ny soa iombonana fa ny mahasoa sy ny mahatsara ny tsirairay no manosika ny ankamaroan’ireo Malagasy hirohatra hisehatra amin’ny lafiny poli(fi)tika.
Tsy tokony ho hadinoina anefa fa tokony hipetraka mandrakariva ho fitaratra mangirana tsy misy pentina azo halain-tahaka ho an’ny Valalabemandry ireo mpanao politika. Ny vahoaka ihany koa tokony hahay hankasitraka ny tolotra hita fa mety sy tsara avy amin’ireo mpitondra fa tsy hanome tsiny mandavan-taona. Nanjavona tao amintsika Malagasy maro anisa ilay toe-po sy toe-tsaina mahay mankasitraka. Mila kopahana hiredareda indray ny afon’ny fitiavan-tanindrazana sy ny firaisankina ao am-pon’ny Malagasy. Fomba iray ahafahana manatanteraka izany ny fanolorana azy ireo ny fanabeazana ho Olom-pirenena vanona sy mandray andraikitra. Manana adidy goavana amin’izany ny mpanao politika. Raha tanteraka izany, handroso tokoa i Madagasikara koa hiadana sy ho finaritra ny Malagasy. Aoka samy handray ny andraikitra sy ny adidy tandrify azy, araka izany, ny isam-batan’olona ary hanana indray ilay toe-tsaina sy toe-po mahay mifampihaino anatin’ny fifanajana feno. Tsy vahaolana ny fifanenjehana sy ny fifanaratsiana re ombieny ombieny ankehitriny. Ampanjakao ny fanetretena e !
