Mitana anjara toerana lehibe eo amin’ny fahasalaman’ny olombelona ny sira misy ioda. Izany no nivoitra sy nampahafantarana ny rehetra, nandritra ny fotoam-pankalazana ny andro maneran-tany momba ny ioda, izay nosokafantsika tany amin’ny distrikan’Ambalavao Tsieniparihy, androany ny fankalazana azy.
Nofidiana manokana moa ity distrika ity noho ny tsi-fanjarian-tsakafo manana taha ambony (54%) ao an-toerana sy amin’ny maha-lavitra ranomasina azy.
Tena ilain’ny vatana
Manan-danja eo amin’ny fiasan’ny vatan’olombelona, indrindra ny ati-doha, ny ioda. Singa mpamelona izay hita any an-dranomasina ity sira ity, ka manana anjara lehibe eo amin’ny fahasalamana na dia fatra kely aza no ilain’ny vatana.
Nofidiana, araka izany ny lohahevitra hoe : « Ny fihinana sira misy ioda, antoky ny fivelarana ara-tsain’ny zaza sy ny fahasalaman’ny daholobe ».
Mbola vitsy ny Malagasy
Araka ny fanadihadiana natao ny 2014 sy 2016 dia fantatra fa ny 21,3%-n’ny tokantrano Malagasy ihany no mampiasa sira misy ioda amin’ny fatra antonony, raha tokony ho 90 % izany, araka ny tatitry ny Sampan-draharaha misahana ny Fahasalamana maneran-tany (na ny OMS).
Fahasahiranana ho an’ny marary ary vesatra ho an’ny fiaraha-monina sy ny firenena, araka izany, ny fahavoazana noho ny tsy fihinanana ity sira misy ioda ity.
Tokony ho iray sotrokely na 5 grama anefa ny fatra sahaza ny olona iray dia afaka manalavitra ny aretina izy. Na koa mihinana ireo sakafo misy ioda, toy ny hazan-dranomasina, atody, ronono, voankazo ary legioma.
Pour mieux vous servir, l’AMP travaillera dans le respect de tout un chacun, dans la réalité des actualités et de ce qui nous entoure. L’objectivité sera notre mot d’ordre.
