Notontosain’ny “AIDES Développement” sy ny mpiara-miombon’antoka aminy, teny amin’ny Louvre Antaninarenina, ny zoma 28 martsa 2025, ny lanonam-pamaranana ny tetikasa “TWEnex”. Tetikasa izay miompana amin’ny fampiasana angovo maharitra. Tamin’io fotoana io ihany koa anefa no nanoloran’izy ireo ny tetikasany vaovao antsoina hoe: “NPS énergie”.
Izy ity izay Vovonana iray miompana amin’ny nomerika ka natao hifampizarana vaovao momba ny sehatry ny angovo maharitra eto Madagasikara izay manasongadina voalohany ny momba ny sehatry ny angovo azo avy amin’ny fako. Tanjona ny tsy fandoroana sy hanapahana ala izay havadika ho arina fandrehitra. Eo ihany koa ny hiarovana ny tontolo iainana mba tsy ho simba tanteraka. Ity sehatra ity izay manome fahafahana miditra amin’ny hetsika maro eto an-toerana toy ny fanavaozana ara-teknolojia, ireo mpilalao samihafa eo amin’ny sehatra ary mazava ho azy ny tarehimarika sy ny antontan’isa. Ahitana fizarana momba ny fahaiza-manao eto an-toerana sy ny lohahevitra hafa mifandraika amin’izany, toy ny fandrahoan-tsakafo madio ihany koa ohatra. Ny “NPS énergie” dia hahasoa ny tanora sy ny mpikaroka ary ny mpampiasa vola izay maniry ny hahafantatra ny tena zava-misy amin’ny sehatry ny angovo maharitra eto Madagasikara, indrindra ny momba ny saribao ekolojika sy ny “briquettes” tsy misy karbonika ary ny “biogaz”.
Araka ny fanazavan’ny tompon’andraikitry ny tetikasa “TWEnex”, Rakotoarivony Sitraka, dia: “ity sehatra fanaparitahana fahalalana ity dia manome fahafahana ho an’ny tanora te hahazo vaovao azo antoka sy voamarina ara-tsiansa. Afaka manara-maso ny momba ity sehatra ity araka izany izy ireo hahafahana mahita zava-baovao ary mifandray amin’ireo mpandray anjara mba hamantarana ny fahafahana mampiasa vola. Na mbola ao anatin’ny dingana fanatsarana aza ireo mpiantsehatra tompon’andraikitra dia miezaka ny hitazona azy io ho vaovao eo amin’ny vontoatiny, mba ho tena araka ny tokony ho izy ny asa famoronana”.
