Maro ireo mpino nandray fanabeazana ara-panahy tamin’ny nanatontosan’ny Trano Fivavahana Vahao ny Oloko, ny kongresy lehibe, fanaon’izy ireo isan-taona, teny amin’ny Temple ByPass. Tamin’ity taona ity dia nanomboka ny alatsinainy 25 aogositra 2025 ka nifarana ny zoma 29 aogositra 2025 izany. Nobeazina tamin’ny fampandrosoana ambony kokoa araka izany ny ara-panahin’ireo mpino ireo.Tamin’ny alalan’ity kongresy lehibe isan-taona ity no nanatontosana izany. Ny fivavahana sy ny andinin-tsoratra Masina no novoizina nandritra ireo dimy andro ireo. Ity fampianarana nampitana ny hafatra rehetra mahakasika ny fanambarana fa antoka hahafahana mampandroso ny firenena iray ny fanabeazana ara-panahy ny mponina ao aminy ity dia mbola hotohizana amin’ilay fanompoam-pivavahana lehibe nampitondraina ny lohateny hoe: “Miakatra ho amin’ny “Dimension” vaovao”, ny sabotsy 26 aogositra 2025, eny amin’ny Coliséum Antsonjombe. Ny Tontolon’ny Fivavahana sy ny fanompoam-pivavahana no tena hibahan-toerana amin’io fotoana izay misokatra ho an’ny rehetra io. Hanasan’ny Trano Fivavahana Vahao ny Oloko ireo mangetaheta fiovana sy fahafahana eo amin’ny fiainany araka izany io tontolo andro io. Tsy nijanona tamin’ireo hetsika ara-pivavahana roa ireo ny Trano Fivavahana Vahao ny Oloko fa mbola hisy ihany koa ny fandaminana asa hotanterahan’izy ireo, ny alahady 31 aogositra 2025. Ny fandaminana ny famindran-toerana ireo Pasitera any amin’ireo faritra manerana ny Nosy no hanompanana ny fotoana. Tanjon’ny Trano Fivavahana Vahao ny Oloko, ny hizara ny fahasoavan’Andriamanitra amin’ny tsirairay avy any amin’izay toerana misy azy, araka ny fanazavan’ny tompon’andraikitry ny fampandehanan-draharaha ao amin’ny Trano Fivavahana Vahao ny Oloko, Pasteur Rafanomezantsoa Heritiana.
