« Fidiovana » endrika hita maso amin’ny alalan’ny fampiasana ny rano hoenti-midio (Fanalana ny ratsy) mialoha ny hiatrehana ny «Alahamadibe ». Azo ambara ho « fomban-drazana malagasy ara-panahy » ihany koa ny « fidiovana ». Mila midio ara-batana, ara-tsaina ary indrindra madio am-po sy fanahy ireo hiatrika ny «Alahamadibe » mba hananan’izy ireo fifantohana feno sy « feon’ny firerireretana mandry » amin’ny fifandraisana amin’ny Zanahary anatin’ny « Alahamadibe » Hotanterahana ny 23 sy 24 Martsa ho avy izao, eny Ankazomalaza (Ambohimanga) izay misy loharano ny « Fidiovana fenomanana » anarana nasalotra noho ny volana hanana endrika feno tanteraka amin’io fotoana io. Ny herin’ny volana sy ny hasin’ny rano, araka izany, no hanamafy ny hananan’ny tsirairay ilay fahadiovana tanteraka (ara-batana, ara-tsaina ara-panahy) ho lavitry ny lonilony, fankahalana, fialonana, sns aorian’ny fanatanterahana ny « Fidiovana fenomanana ».
Marihana hatrany fa tsy fety akory ny « Alahamadibe » fa famerenan-kasina mba tsy hisy tomika ny famakivakiana ny taona vaovao miaraka amin’ilay Zanahary. Ny fametrahana ny « Hasina » amin’ny toerana mendrika sy sahaza azy izay zava-dehibe sy antoka ho amin’ny hisian’ny firindran’ny firahamonina eo amin’ny mpitondra sy ny Vahoaka ary mipaka hatrany amin’ny fiainam-pirenena. Tsiahivina hatrany fa ny 09 hatramin’ny 11 Aprily ho avy izao, no hanatanterahana ny « Ivon’ny fankalazana ny Alahamadibe 2024 », eny amin’ny Doany Mananara Ambatofahavalo Dadabe Andriamanandroanio. Hiara-dalana amin’izany ny fitokanana ny Lapa sy ny fitsofan-drano ny Vahoaka. Ny fantanterahana ny « Alahamadibe » izay mbola tafiditra mandrakariva amin’ny ezaka ho amin’ny famerenan-kasina an’i Madagasikara.
