Nandray ny hetsika foarabe an’Alaotra ny Distrikan’Ambatondrazaka nanomboka ny 24 jolay lasa teo, izay tsy hifarana raha tsy ny sabotsy 27 jolay. Ny Trait d-Union Madagascar, izay orinasa mpikarakara hetsika ara-kolotsaina sy toe-karena irasam-pirenena izay tsy zoviana amin’ny maro intsony, no mikarakara ity foarabe an’Alaotra ity izay eo ambany fiahian’ny Ministera mpiahy, ny tomponandraiki-panjakana any amin’ny Faritra Alaotra Mangoro, ny Ben’ny tanànan’Ambatondrazaka Renivohitra.
Ity hetsika ity izay natao hanasongadinana ny vokatra any an-toerana sy ny fomba amam-panao Sihanaka. Tranohefa manodidina ny 400 mahery no handraisana ireo hampiranty sy hivarotra mandritra ity hetsika foarabe ity. Tsy ny avy ao Ambatondrazaka ihany no mandray anjara amin’ny fampirantiana fa misy ihany koa ny ivelan’ny Faritra toa an’Antananarivo, Antsirabe, Toamasina sy ny maro. Maro ny zavatra hita ao antoerana toy ny fampirantiana sy varotra, ny fialamboly maro isankarazany. Hiavaka ihany koa ny fisian’ny fifaninana “Fitafy Sihanaka” ka hanentanana ny rehetra handray anjara fa misy ny loka atolotra hoan’ireo mendrika amin’izany. Nambaran-dRamatoa Tsinjo Gabrielle tomponandraikitra ao amin’ny Trait d-Union Madagascar fa hamafisina ny lafiny fitandroana ny filaminana izay ahitana sivily sy mpitandro filaminana hiandraikitra izany mba hilamina sy tsy hisy ny olana.
