Ny tontolon’ny fanabeazana, fahasalamana, fitaterana, fandriampahalemana, sns… Samy efa nanaovan’ny avy eo anivon’ny fiadidiana ny Kaominina Andranonahoatra, izy tarihan’ny ben’ny tanàna Rasamison Hajanirina sy ireo mpiara-miasa aminy akaiky ezaka manokana avokoa ireo ho fanampiana ireo mponina eny an-toerana.
Teo amin’ny lafiny fampianarana nisy ny fanorenana efitrano fianarana fanampiny miisa roa teny anivon’ny fokontany miisa dimy toy ny EPP Ambaniala, Ambohimamory, Ambanilalana, Andranonahoatra, sns. Natsangana ihany koa ny efitrano famakiana boky ho an’Ambanilalana. Nisy hatrany ny asa fanarenana sy fanamboarana ireo toeram-pianarana toy ny fandrakofana tara ny tokotanin-tsekolin’ny CEG sy ny Lycée ao Andranonahoatra ary ny fanorenana ny efitrano natokana ho an’ireo mpandraharaha eo anivon’ny sekoly.
Eo amin’ny sehatry ny fahasalamana nanaovana hetsika manokana ny fampitaovana ireo CSB II toy ny fanolorana kidoro, vata fampangatsiahana ahafahana mitahiry ireo vaksiny. Niara-dalana tamin’izany ny fanorenana CSB II vaovao ho an’ny fokontany tao Ambaniala. Nasiana efitrano fiterahana izany taty aoriana ho fanamaivanana ny fahasahiranana ho an’ireo Reny mitondra vohoka.
Asa goavana ary andrandraina hampihena kokoa ny fitohanan’ny fifamoivoizana ny fanokafana ny lalana miainga eo Ambaniala ary mivoaka eny Anosizato tafiditra anatin’ny fiaraha-miasa amin’ny tetikasa « Produir » izy ity. Maro amin’ireo lalan-kely eny anivon’ireo fokontany miisa fito mandrafitra ny kaominina Andranonahoatra ihany koa no efa vita rarivato izay tena nanamaivana ny fahasahiranan’ireo mponina amin’ny fivezivezena rehefa fotoam-pahavaratra. Mitohy hatrany ny fanokafana ireo tatatra andehanan’ireo rano maloto sy ny fanadiovana ireo lalan-kely vita rarivato. Anisan’ny nasiam-panamboarana ny ampahan-dalana manakaiky an’ny betavoahangy Andanonahoatra izay nanala fahasahiranana ireo mponina mpampiasa izany ami’ny fiotohanana tokoa ny fahavitany rarivato « Pavé » anlehitriny.
Nanao ezaka manokana ho fanamafisana ny fandriamapahalemana ihnany koa ny Kaomnina Andranonahoatra, tafiditra antin’izany ny fametrahana takamoa tamin’ireo andrin-jiro. Anisan’ny nisitraka izany vao tsy ela akory ny faritra Antanety Ambohimamory izay nalaza ratsy tamin’ny tsy fandriampahalemana teo aloha teo. Manana ny poste de police ihany koa ankehitriny ny fokontany Ambaniala Ho an’ny tanora efa maro ny fanorenana kianja fanaovana fanatanjahatena toy ny ao amin’ny fokontany Akany Sambatra Itaosy. Nomarihan’ny avy eo anivon’ny Kaomnina Andranonahoatra fa fanamby apetrak’izy ireo amin’ireo mikarakara taratasy ny fanafain,ganana ny fahavitan’izy ireny. Apetraka hatrany ihany koa ny fitantanana mangarahara mba hahafahana manatontosa ireo vinanasa ho amin’ny tombontsoa iombonan’ireo mponina eny anivon’ny fokontany miisa fito mandrafitra ny kaominina Andranonahoatra. Naneho ny fahavononany mbola hanohy ny fanatanterahana ireo asa ny ben’ny tanàna eo anivon’ny Kaominina Andranonahoatra Rasamison Hajanirina ary hifanome tanana hatrany amin’ireo mponina ho amin’ny fampandrosoana an’Andranonahoatra.
