Mitombo isa hatrany ireo mpivarotra manamorona ny lalam-baovao Tsarasaotra izay mampitohy ny renivohitra amin’ny seranam-piaramanidina Ivato. Mety hitera-doza ho an’ireo mampiasa ny lalana ny fisan’izy ireny koa tsy maintsy halana. Misy rahateo ny lalàna mifehy ny moron-dalana izay tsy voahaja raha ny zavamisy eny an-toerana ankehitriny.
Halana anatin’ny fifampidinihana
Iaraha-mahalala fa anatin’ny fotoan-tsarotra tanteraka ny Malagasy amin’izao fandalovan’ny covid- 19 izao. Antony mahatonga ny fitomboan’isan’ireo mpivarotra amoron-dalana eny Tsarasaotra ihany koa izany.
Manoloana izany, hisy ny fifampidinihana hataon’ny avy eo anivon’ny Minisiteran’ny fanajariana ny tany sy ny asa vaventy miaraka amin’ireo kaominina manodidina ity lalam-baovao ity hitadiavana toerana hamindrana ireo mpivarotra amoron-dalana. Tsy mbola hisy, araka izany, ny fanalana avy hatrany ireo mpivarotra raha tsy efa hita sy tomombana ny toerana hametrahana azy ireo. Nahavelom-bolo ireo mpisehatra amin’ny varotra amoron-dalana ny fanapahan-kevitra noraisin’ny avy eo anivon’ny minisiteran’ny ny asa vaventy sy fanajariana ny tany. Mila mitandrina hatrany kosa anefa ireo rehetra mpampiasa iny lalana iny hisorohana ny loza mety hitranga.
