Maminirina Restogasy, Renim-pianakavina tanora, avara-pianarana, Zanaky ny Kaominina Bongatsara. Tonga ny fotoana handraisana an-tanana ny fampandrosoana an’ny Bongatsara, hoy i Maminirina Resto gasy, Kandidà ben’ny tanàna, mitondra ny laharana faharoa anatin’ny biletà tokana. Natolotry ny tsy miankina « Krsitianina sahia mampandroso ». Ny fahatsapana fa taraiky ihany amin’ny lafiny fampandrosoana i Bongatsara raha mitaha amin’ireo Kaominina manodidina azy sy ny amin’ny maha zanaky Bongatsara azy. Ireo mitambatra no nanosika an’i Maminirina Resto gasy hirotsaka ho fidina ben’ny tanàna eny Bongatsara. Nandalina manokana ny tontolon’ny « Haitarika » teto an-toerana sy hatrany ampita i Maminirina Restogasy. Nomarihany fa azo atao tsara ny mampihatra ny fianarana natao ho amin’ny fampandrosoana ifotony toy ny Kaominina.
Mandrafitra ny vinanasam-pampandrosoana narafitr’i Maminirina Resto gasy sy ireo mpiara miasa aminy akaiky ny fanampiana ireo Tantsaha (Mpamboly sy mpiompy) ahafahana mampandroso ny tontolo ambanivohitra amin’ny alalan’ny fametrahana ny rafitra Kaoperativa mba hanamorana ny fitadiavana lalam-barotra sy hahafahana miaro ny vidim-bokatra amin’ireo mpijrika. Fanolorana fiofanana ahafahana manatsara ny kalitaon’ireo Vokatra ara-pambolena sy fiompiana. Omena hasiny ary hampiana ireo Tantsaha izay kitro ifaharan’ny asa fampandrosoana eo anivon’ny kaominina Bongatsara noho izy ireo maro anisa. Ny fananganana foto-drafitrasa hahafahana mikajy ny lafiny fahadiovana, ny fandrindrana ny lafiny fanorenan-trano mba hampirindra sy hampilamina ny drafitry ny tanàna. Hisy ny fanavaozana sy fanatsarana ary ny fampitaovana azy ireny. Hisy ny ivon-toerna fampiofanana ireo tanora mba hanamorana ny fitadiavan’izy ireo asa. Ny fanamafisana ny lafiny fandriampahalemana. Tsy ho hatao ambanin-javatra ny fanolorana endrim-panabeazana sy fitaizana ireo mponina mba hahay handray andraikitra amin’ny manandrify azy ny tsirairay. Tsy hotanteraka anefa ireo rehetra ireo raha tsy tafapetraka ny mangarahara sy ny fahaiza-mitantana eo anivon’ny Kaominina, hoy i Maminirina Resto gasy. Hisy, araka izany, ny fametrahana paikady hiadiana amin’ny kolikoly. Nanentana ireo mponina i Maminirina Restogasy mba hiaro ny safidiny sy tsy ho tratry ny mena miraviravy koa sanatria hivarotra ny safidy amin’ny « Tapi-maso » tsy mahavita taona.
