Ramiandrisoa Jalèma Monico, no tena anarany, Zanak’Andapa, ny tovolahy. Tany amin’ny taom-pahazazany i Jalèma no efa tia mozika sy mitendry zavamaneno ary mamorona hira. Ny Dadabeny izay anisan’ireo kalazalahy tokoa tamin’ny fitendrena ny angorodao ary ny Reniny niteraka azy anisan’ny tena mankafy ny mihira. Nahafahan’i Jalèma nanatevina ny talentany avy amin-janahary ihany koa ny naha mpikambana mavitrika azy teo anivon’ny « Groupe artistique » iray tany Andapa.
Ankehitriny, tapa-kevitra ny hanokana manontolo ny talenta ananany izay nampiany fandalinana ny taranja mozika ho amin’ny fiderana ny Ray sy maneho fijoroana vavolombelona hatrany ny maha tsara ny Tompo ary ny hitarihana ny Olombelona rehetra tsy ankanavaka ho ao amin’Andriamanitra ny tovolahy.
Ankoatry ny maha mpamorona, mpandrindra ary mpitendry vatamaroafitsoka an’i Jalèma any am-piangonana dia mahay mihira sy mikirakira ny lafiny feo amin’ny alalan’ny fampiasana ireo fitaoavana manaraka ny fivoaran’ny teknolojia avo lenta ihany koa izy. Manana trano fandraisam-peo « Jalèma prod » any Antsiranana ny tovolahy ary an-dalana amin’ny fanatevenana ireo fitaovana ampiasaina ao anatiny izy ankehitriny.
Mirona amin’ny fiangaliana ny « Mozika tropikaly » (Mozika mihetsika sy mafana) i Ramiandrisoa Jalèma Monico, anatin’ny fiangaliana ny « mozika evenjelika ». Anisan’ny gadona lalaoviny ny « Salegy », « Sud af », « Reggae », « Zouk love », « Sega » sns. Tsy mihanona hatreo amin’ny filalaovana ireo bankira mihetsika i Jalèma fa manao fikarohana isanandro amin’ny fampiarahana azy ireny amin’ny mozika hafa mba ahafahana manajary « Mozika vaovao » sahaza sy mendrika ny sehatry ny fiderana an’Andriamanitra sy ny asa fitoriana an-kira sy mozika ravahana dihy izay ataony. Mahafehy y gadona milamina ihany koa ny tovolahy. Nofidiko manokana ny milalao ny « mozika mihetsika », hoy hatrany i Jalèma ahafahana manamora ny fitarihana ireo tanora nania mba hiditra am-balan’ny Tompo indray.Ampahany amin’ireo sanganasa efa maro mpankafy ny « Izaho hanaraka Anao », « Mifona », « Izy miady ho Anay », sns…
Hanamarika ny fidiran’i Jalèma anatin’ny sehatra maha matihanina azy amin’ny fikirakirana ny « Hira evenjelika » ny hisian’ny fampiaraham-peo tsy ho ela eo aminy sy ilay Mpanakanto andrarezin’ny filalaovana ny « Mozika tropikaly » eto Madagasikara. Hivoaka mialoha ny fetin’ny Paka, ity fampiaraham-peo ity. Malalaka amin’ny fiaraha-miasa i jalèma ary tsy manavaka finoana. Azo inoana fa hanana ny hoaviny mamiratra ity mpanakanto tanora resy lahatra ho amin’ny asa fitoriana sy fiderana ny Tompo amin’ny alalan’ny mzoika sy ny hira ravahana dihy mendrika ity.
