Vazo miteny ranoiray ravahan’ny feon-gitara sy ireo zavamaneno lafika hafa toy ny vatamaroafitsoka, aponga, sns, hiarahana amin’i Samoela,hotanterahana, etsy amin’ny Madagascar Espace By-pass Ambohimangakely, rahampitso Zoma 26 jolay, hanomboka amin’ny sivy ora alina. Io no hitsena ireo avy nanala fanadinana Bakalorea te « hanala azy » farany teo sy ireo mpiondana Samoela tsy miala efa an-taonany maro.
Nomarihan’ireo mpikarakara fa ireo vazo miteny tsanganasan’ny tarika Samoela avokoa no handrafitra ny fandaharan-kira eny an-toerana. Hifanakaiky bebe kokoa ny mpanakanto Samoela sy ireo mpankafy amin’ity indray mitoraka ity. Tsy isalasalana fa dia hisy, araka izany, ny fiaraha-mivazo eo amin’ny roa tonta. Tsy misaraka amin’ny hetsika tahaka itony ny karazan-tsakafo amin’ny endriny samihafa sy ireo zavapisotro isan-tsokajiny. Tsy ho latsa-danja ny lafiny fanamafisam-peo izay ny « Be mozik » no hiantsoroka izany ary ny « Mada sound » no hiangaly ny jiro sy ny hazavana. Tanjona ny hahalafatra ny fiarahana ahafahana manatratra ny tanjona dia ny rehetra « hanala azy » anatin’ny kanto sy meva ary ny mendrika. Tsy zoviana am !in’ny fikarakarana hetsika tahaka izao rahateo ny Madagascar Espace, etsy amin’ny By-pass Ambohimangakely ; Ny masoandro miposaka no hampalahelo e !
