Tsy vaovao amin’ny malagasy ny fampiasana tambavy fa efa hatrany amin’ny razambe taloha, hoy ny sekretera jeneralin’ny antoko politika Maintso, Fenosoa Ralandison. Maro koa ny manam-pahaizana malagasy no efa nandinika izany. Io fa tonga ankehitriny ny vokatra, hoy izy. Manao antso avo amin’ny malagasy aho, mba hanana fahatokisana amin’ny manam-pahaizantsika. Aoka koa isika hanana fitokisana fa manana fanantenana, satria ny 80% – n’ny zava-maniry eto, dia antsika irery ary manana ny singa ahafahana mitsabo sy misoroka ny karazan’aretina maro, hoy ny fanazavany. Amin’ny maha olom-pirenena ahy no hilazako, fa tsy vao sambany amin’ny voka-pikarohan’ny IMRA akory ny “Covid Organics”, ka sanatria hitavozavoza amin’izany izy. Aoka mba hanana ny maha izy azy ny Malagasy fa tsy hametrahana baraingo foana ny zava-bitantsika. Ekeko fa aina no resaka ary na inona na inona fanafody dia mametraka ahiahy hatrany, saingy matoa navoaka io dia farafahakeliny ao ilay fahazohana antoka azy, hoy hatrany ny tenany.
