Amin’ny maha Fiangonana (Eglizy) ny Hebreo notsrym dia manana andraikitra omban’adidy amin’ny fanatanterahana asa sosialy ihany koa izy ireo. Ho an’ny Fiangonana « Hebreo notsrym » dia ny lafiny ny fanabeazana ireo zaza sahirana no sehatrasa ataon’izy ireo amin’ny alalan’ny fisian’ireo sekoly miisa roa, miorina, eto an-drenivohitra sy ny manodidina.
Manana sekoly miisa roa, etsy Anosizato atsinanana sy eny Faraindra Ambohitrimanjaka, araka izany, ny fiangonana Hebreo notsrym. Sekoly « Miavaka » no anarana isalaoran’izy ireo. Manomboka any amin’ny garabola ka hatrany amin’ny kilasy famaranana ireo lakilasy misy ao amin’ny Sekoly « Miavaka » Mpanabe manana traikefa sy haizatra matanjaka notovozina avy amin’ireo fiofanana, miisa roa ambiny telompolo, no miara-misalahy mampita fahendrena sy fahalalana amin’ireo mpianatra. Mifaka amin’ny famerenana ny « kolom-piaraha-monina » malagasy toy ny fanajana amin’ny ankapobeny sy ny fahaiza-miaina ary ny fampitana miandalana ireo fomba sy kolontsaina Hebreo izay misy fitoviany maro amin’ny an’ny Malagasy ny fampianarana eny an-toerana. Misy ny taranja « fanabeazana ho Olom-pirenena vanona » (Education civique) eo anivon’ny sekoly. Amin’ny maha « Sekolin’ireo sahirana » ny sekoly « Miavaka » dia noezahana ho zakan’ny rehetra ny saram-pianarana. Tsy midika akory hoe : Ratsy ny kalitaon’ny tolotra omena ireo mpianatra, hoy i Shalar Andriamady Rija ; voaporofo amin’ny tahan’ireo afa-panadinana ara-panjakana toy ny « CEPE » izay manafosafo ny sivyfolo isan-jato hatrany izany. Zava-baovao amin’ity taom-pianarana ity ny fampidirana ny fampianarana miandalana ny fifehezana ny teny Hebreo sy ny fampitana ny kolontsaina sy kolom-piaraha-monina Hebreo. Tsy tafiditra amin’ny taranja hanadinana ao an-tsekoly akory izy ireo fa tombom-pahalalana afahana misintona fahendrena omena ireo mpianatra, hoy hatrany i Shalar Andriamady Rija. Hentitra amin’ny fampanarahana sy fampiharana ny « Fitsipi-pifehezana » (Discipline) ao an-tsekoly ireo Mpampianatra.
Marihana fa anisan’ny mampiavaka ny Hebreo ny fanarahan-dalana sy ny fanajana izany mba hampirindra ny fiarahamonina. Nahitam-bokatsoa maro ho an’ireo mpianatra, hoy, ireo mpanabe ny fampiharana ity fomba fiasa mifaka amin’ny fanajana ny fiotsipi-pifehezana napetraka ity. Marihana fa misy ny sakafo antoandro « Cantine » ho an’ireo Zaza sahirana. Manao antso avo amin’ireo tsara sitra-po ny eo anivon’ny Sekoly « Miavaka » hifanome tanana ho amin’ny fanitarana ny sekoly mba hitombo hatrany ireo afaka hisitraka ny tolotra fampianarana omen’ireo mpanabe. Iaraha-mahafantatra tokoa mantsy fa maro amintsika Malagasy no tsy manana fahefana hampiana-janaka intsony noho ny fahasahiranana misy ankehitriny. Tsy manavaka finoana ny Sekoly « Miavaka », etsy Anosizato atsinanana sy Faraindra Ambohitrimanjaka.
