Ny Printsy Andry Rodrigue no niezaka nikaroka sy namoha indray ny teknolojia tranainy entina nitrandraka ny sehatry ny fifandraisana sy ny fahazoam-baovao amin’ny alalan’ny fampiasana ny tara masoandro. Efa mandia ny faha dimy taona nandalinana ny tontolon’ny « Heliosera » ny Printsy Andry Rodrigue ankehitriny. Raha hazavaina tsotra teknolojia mampiasa ny herin’ny masoandro « Helios » ho amin’ny fanangonam-baovao sy ny fifandraisana ny « Heliosera ». « Ny fananana antontam-baovao maro sy marim-pototra sy fifandraisana mivelatra no hahafahana mizotra mankany amin’ny fampiharana ary mipaka ho amin’ny fahombiazana eo amin’ny seham-pihariana izay hatao», hoy ny Printsy Andry Rodrigue. Tsy afa misaraka amin’ny fampiroboroboana ny sehatry ny fandraharahana, fampianarana, fahasalamana, sns rahateo ny fikirakirana ny fifandraisana sy ny fananana antontam-baovao marolafy. Nomarihan’ny Printsy Andry Rodrigue fa afaka mampiasa ny « Heliosera » avokoa ny sokajin’Olombelona rehetra noho ny masoandro tsy mialonjafy fa ho an’ny rehetra. Hiroso tsy ho ela amin’ny fanaovana velan-kevitra arahana fampiharana avy hatrany ny fomba fampiasana ny « Heliosera » ny Printsy Andry Rodrigue sy ireo mpiara-miasa akaiky aminy. Nomarihany fa hovelarina bebe kokoa ny sehatra hanatontosana ny andiany faha enina amin’ny fampiofanana arahana fampiharana avy hatrany ny fomba fampiasana ny « Heliosera » Fizika azo refesina, sy tsapain-tanana ranoiray tsy misy idiran’ny herin’ny maizina ny « Heliosera », hoy ny Printsy Andry Rodrigue fa ny famolaham-batana no takiana aminy. Azo heverina, araka izany, ny hanapariahana ny « Heliosera » ho amin’ny fanatanterahana ireo asa fampandrosoana hialana amin’ny fahantrana manempotra an-dRamalagasy ankehitriny.
