Razafihasimalala Kelhie, no anarany, andriambavilanitra malagasy manan-talenta notovanana fianarana ambony amin’ny fikirakirana ny lamba hanjary akanjo fianjaika mihaja sy kanto ary manaraka ny fenitra anatin’ny habaky ny lamaody. Misehatra amin’ny fanamboarana kiraro vita amin’ny hoditra sy akora fototra misy eto Madagasikara ihany koa ankehitriny ny « Bogasy ». Izy no Malagasy voalohany namokatra « Tennis » vita eto an-toerana.
Vao teo amin’ny faha- enina ambiny folon’ny taonany i Kelhie Bogasy no efa nanan-talenta tamin’ny famoronana akanjo mainga amin’ny « fakana sary an-tsaina » amin’ny ankapobeny ny fomba fanatontosany izany. Niainga tamin’ny famoronana sy fanjairana akanjon’ireo « andriambavilanitra bota » izany tany amin’ny manodidina ny taona 2016 ary nipaka hatramin’ny fananganana akanjo mihaja ho an’ny lehilahy ho famaliana ny filan’izy ireo. Mampiavaka ny vokatra « Bogasy » ny hatsaran’ny kalitaon’ireo akanjo toy ny zaitra mirindra tsara sy mafy nentina nandrafitra azy, ny kalitaon’ny lamba ampiasaina (mihaja sy mafy) izay ny enimpolo isan-jatony avy eto an-toerana ary ny efapolo isan-jato kosa no hafarana avy any ivelany. Manaja antsakany sy andavany ny fotoana hambara amin’ireo mpanjifa fa hahavitan’ny asa ny « Bogasy ». Tsy mitsahatra ny mikaroka ny fomba rehetra hanatsarana ny vokatra ireo mpiara-miasa eo anivon’ny « Bogasy ». Ny miasa miaraka no fahombiazana sy ny fandraisana anjara mavitrika eo amin’ny rehetra anatin’ny fahavitrihana sy ny faharesen-dahatra rahateo no fomba fiasa manentana ny tsirairay.
Tsy voatery hanafatra avy any ivelany vao mianjaika ny tsara sy ny raitra ny Malagasy, hoy Razafihasimalala Kelhie fa manana ny fahaiza-manao sy ny talentany ny Andriambavilanitra malagasy koa tsy tokony ho sakanana amin’ny hoe : « Mpikarakara tokatrano » fotsiny ihany, fa avelao izy ireo handray anjara mavitrika, ho amin’ny fampandrosoana, ny firenena. Anisan’ny olana sedrain’ny « Bogasy » ny fiovaovan’ny vidin’ireo akora fototra hafarana avy any ivelany. Fanamby goavana miandry an-dRazafihasimalala Kelhie ny hanaparitaka ny vokatra « vita malagasy » eo anivon’ny tsena iraisam-pirenena sy ny « hanafika » ny tsenan’ireo hafa firenena. Anisan’ireo mpisehatra eo amin’ny lamaody handray anjara amin’ny « Miss monde » anatin’ny « Meilleur styliste du Monde » hatao any Inde amin’ny volana Martsa i Bogasy. Tsetsatsetsa tsy aritra no ilazana fa efa nampiakanjo ny filoham-pirenena malagasy ankehitriny sy ilay mpanao baolina kitra anatin’ny ekipam-pirenena frantsay « K. Mbappe » ihany koa i Razafihasimalala Kelhie tamin’ny alalan’ny vokatra « Bogasy ».
