Azo ambara fa nanampy betsaka ireo mpanao hosodoko tamin’ny fanajariana sanganasa vaovao ny fisian’ny fihibohana. Maro tamin’izy ireo no nahavita tabilao vaovao notovozina avy amin’ny aingam-panahy sy famoronana vokatry ny fijanonana tao an-trano.
Mihisatra ny varotra
Nisy fiantraikany ratsy teo amin’ny lafiny ara-barotr’ireo mpanao hosodoko kosa anefa ny fisian’ny hamehana ara-pahasalamana. Teratany vahiny no maro an’isa amin’ireo mpanjifa ireo tabilao vitan’ny mpanao hosodoko malagasy. Maro amin’izy ireny anefa no voatery nandao an’i Gasikara noho ny fipariahan’ny covid- 19. Mihena ny isan’ireo tabilao lafo ary mihisatra ny varotra, hoy i Nary Arthur, iray amin’ireo mpanao hosodoko mampiranty ny vokakantony, etsy amin’ny Tahala Rarihasina Analakely.
Manoloana izany, tsy miraviravy tanàna ireo mpanao hosodoko fa miezaka hatrany mikaroka lalam-barotra amin’ny alalan’ny fanatanterahana varotra fampisehoana. Tanjona amin’ny fanaovana ny varotra fampirantiana ireo tabilao ihany koa ny hampitiavana bebe kokoa ny Malagasy ny hakanton’ny hosodoko. Tsy misalasala mizara ny fahaiza-manao sy ny traikefa ananany ihany koa ireo mpanao hsodoko eto an-tanàna ho fanabeazam-boho hatrany ny habaky ny kanto.
Mitoetra ho olana hatrany kosa hatreto ny tsy mba fananan’izy ireo toerana manara-penitra ahafahana mampiranty sy mivarotra ireo vokatra. Manginy fotsiny ny tsy mbola fijoroan’ny Sekolin’ny kanto « Ecole des beaux-arts ». Ity farany izay sehatra sy ivon-toerana iray ahafahana mamolavola mpanan-talenta matihanina eken’ny maneran-tany. Fotoana efa tokony hametrahana izany ankehitriny mba ho fanoitran’ny fampandrosoana tokoa ny kolontsaina.
